От мятежа мирскаго удалився,/ к немерцающему Свету притекл еси, преподобне отче Лонгине,/ и ныне чисте зриши Святую Троицу,/ Юже моли за ны недостойныя,/ да спасет души наша.

По словеси Учителя Христа,/ крест на рамо твое приял еси,/ вся житейская отринув,/ и образ Животворящаго Древа в пустыню принесл еси,/ идеже доныне исцеления неоскудно источаются/ с верою приходящим к тебе.

Преподобне и чудотворче, отче Прохоре,/ препитавый во гладе алчущия хлебом от былия и солию от пепела,/ напитай и нас пищею духовною,/ моля Христа Бога/ о душах наших.

Велиим воздержанием удручая плоть свою, святе,/ лишився пищи человеческия,/ зелием и травою вместо хлеба, пепелом же, аки солию, питался еси,/ чудодейственне Прохоре./ Еже видя, Господь преложи зелие во хлеб и пепел в соль,/ имиже ты множество гладных препитал еси,/ тем тя чтем и ублажаем.

Яко столп избранный Церкве Христовой/ и светильник присносветлый всея вселенныя,/ премудре показася, Харалампие,/ возсия в мире мучением,/ разруши идольское мракобесие, блаженне,/ сего ради явися предстатель Христу,/ молися спастися нам.

Страстотерпцу Харалампию приступим/ и образу его поклонимся, от сердца вопиюще:/ мучениче Харалампие и отче,/ от всякаго обстояния и всех бед своих раб избави нас,/ в церкве твоей выну пребывающих.

Пострадавый мужески и мученический надевый венец,/ священномучениче преславне Харалампие, / свобода раб твоих от губительства и всякаго зла,/ напастей и бед, святе,/ с любовию твое призывающих чудное имя.

Молитвами твоими ко Господу/ от зол, бед, напастей свободи/ верно к тебе прибегающих/ и сетей избави вражиих,/ велий страстотерпче Харалампие.